الأحد، 12 مايو، 2013

انا إخوان .. الجخ

احدث قصائد الجخ "أنا إخوان"

انا إخوان ..

و كل المسلمين اخوان ..
فما اتصنفش اسلامي على كيفك ..
حقيقتي اقوى من زيفك ..
وصابعي لوحدو بكفوفك ..
و لا اتهزش قصاد خوفك ..
يا خوف ..
يا جبان ..
انا اخوان ..



بطيع الله في ملكوتو ..

و بدعي يزيدني من فضله و من قوتو و اصلي و صوم ..
و اجاهد نفسي و اصبر عَ البلا و احمد و حمدي يدوم ..
لانه الرازق الوهاب ..
و هو مسبب الاسباب فليه الفضل و المنة و ليه الطاعة ..
فمتبصش لديني نظرة طماعة ..
انا ديني لا هو سلعة و لا بضاعة و لا ليه سوق ..
لا انا بايع و لا شاري ..
ايماني هو رسمالي فإصحى وفوق ..
مانيش اخوان على نهجك ..
فلم من الدروب همجك ..
كفاية شقوق ..
مش انت لوحدك الاخوان ..
انا اخوان ..
بحق الله و بالسنة و بالقرآن ..
وقت الجد انا عثمان ..
وقت الحرب انا حمزة ..
وقت الفصل ببقى فاروق ..
انا اخوان على الرحمة و ع التقوى و حب الناس ..
لكن عمري ما حتأخون بأخونتك على الصندوق ..

عينيكم فيها كل النور و مش شايفة ..

غباوة انك تهدد ناس ماهيش خايفة ..
بتهدد في مين يا حزين ..
ده انا الآهه اللي طلقوني..
وجيعة و سايحة في الشارع مش ممكن حتخفوني ..
حتسمعني .. و غصب عن عينيك الجوز على دماغك حترفعني ..
انا الناس اللي عاشت تحت خط الفقر ..
و انا الناس اللي ماتت ملتقيتش القبر ..
فسيبك من اللي بيجاملك و بيهيص ..
و ركزلي و اسمع كلمتي كويس ..
انا الثورة اللي عملت منك الريس ..

انا اللي يادوب من سنتين ..

كنا بنتحبس صحبة ..
و كنا بنتجلد صحبة ..
وكنا في الميدان صحبة ..
بتبعد ليه و تكتب ع الطريق غربة ..
بتمشي في الطريق الصعب وحدك ليه مهملني ..
مالو صعبة عليك الشيلة .. حملني ..
تلاقيني بعارضك آه ..
لكني وراك ..
بجدف في السفينة معاك ..
اكون ودنك اكون عينك ..
اكون قوة في دراعينك ..
نبني بلدنا لهوانا مش لهواك ..
و خيرنا يبقى جوانا مش جواك ..
مش انت تاخدلي في القرارات ..
و انا اللي أمسح بايدي .. خراك ..

ما تتلككش بالناس اللي بيعارضوك ..

ما تتشتتش ؟؟
ماتتسوحش..
بلدنا عايزة ريس وحش
يسمع نقده بودانه ما يتكبرش ..
يكون جبار على الظالمين رحيم بينا ..
ينام بينا و يقوم بينا ..
يمشي يعس في الشارع على الجعانين ..
و يفهم اني في الشارع شباب ثايرين ..
مالحقوش يبقو كارهينك ..
فماتزودش نار الكره في قلوبهم ..
شباب شايف فلوس بلده مش بتخش في جيوبهم ..
ما تخدعناش ببقين من بتوع حسني يا مولانا ..
ورمنا كلام و صدى من الغُنى قفانا ..

ما تدبحليش حمامة يتيمة على عينها و تقنعني انو ديك رومي ..

ما تلعبش انت في المية و تمسح ايدك المبلولة في هدومي ..
و مش كل اما توعد وعد تطلع بُق ..
ما تشدش فرامل اليد و تطلب مني انزل ازُق ..
و لما الناس تكون ثايرة ومختلفة ما تخطبليش في اتباعك ..
و لما تكون مع وزيرة ما تلعبليش في ((( دراعك )))

و لا تسمعني و لا اهلي و لا عشيرتي ..

و خيرنا يبقى لبلدنا قبل ما أبص على جيرتي ..
بلدنا احواض من البركة بعمر النيل ..
بلد دفيانة بالقرآن و بالانجيل ..

انا اخوان ..

انا اخوان ..
مش انت لوحدك الاخوان ..
انا اخوان و كل المسلمين اخوان ..
فما اتصنفش اسلامي على كيفك ..
حقيقتي اقوى من زيفك ..

‏ليست هناك تعليقات:

إرسال تعليق